Шәріпов Миғаш Смағұлұлы

ШӘРІПОВ Миғаш Смағұлұлы (8.3.1927, қазіргі М. Жұмабаев атынд. ауд. Сарытомар а.) – педагог, ақын, әнші, сазгер. КСРО ағарту ісінің, Қазақстан халық ағарту ісінің үздігі. Петропавл пед. техникумын, Қаз-МУ-ды (қазіргі Әл-Фараби атынд. Қазақ ұлттық ун-ті) бітірген. Еңбек жолын колхозшы болып бастап, 1943-49 ж. бастауыш мектеп мұғалімі, 1950 – 52 ж. Булаев ауд. мектептерінің инспекторы, 1957-66 ж. Солт. Қазақстан, Алматы обл., Алматы қ., мектептерінде директор, 1966-76 ж. Қазақстан білім беру мин-нде, 1977-79 ж. Алматы қ-ның Алатау ауд. білім беру қызметкерлері кәсіподағы к-тінде, 1979-88 ж. Алматы обл. білім беру жүйесінде қызметтер атқарған. 1988-96 ж. Респ. пед. музейдің аға ғыл. қызметкері болды. 150-ден астам өлеңі мен 100-ден аса әні бар. Алматы қ-ндағы “Рауан” баспасынан “Бәйшешек” өлеңдер жинағы, ал 2001 ж. “Үлгілі ұжым” жинағында туындылары жарық көрген. Бірнеше медаль және грамоталармен марапатталған.

Қ.Мұқанов