Ғабит Мүсірепов туралы естеліктер

Өмірімен де, еңбегімен де туған халқының ілтипатына бөленіп, оның сүйіктісіне айналатын ұлдары болады. Мұхтар Әуезов, Сәбит Мұқанов, Ғабит Мүсірепов, Ғабиден Мұстафин осындай ұлы тұлғалар болды.
Олардың жазушылық өнерін қазақ халқы ғана емес, бүкіл әлем мойындап, шығармалары көптеген шет тілдерде басылды.
XX ғ. қазақ әдебиетінің абыройын асырып, мәртебесін биіктеткен классиктердің бірі, көркем сөздің ұстасы, тапқырлық пен шешендіктің нұсқасы, дарқан дарын, академик-жазушы, Социалистік Еңбек Ері Ғабит Махмұтұлы Мүсірепов еді.
Кітапта ұлы сөз зергері, халқымыздың алыптар тобындағы ақиықтарының бірі - Ғабит Мүсірепов туралы ұлы тұлғалардың, ақын-жазушылардың, сыншылардың, ғалымдардың, тума-туыстарының естеліктері берілген. Құрастырушы Мемлекеттік мұрағаттағы Ғ. Мүсіреповтің жеке қоры мен оның мұражайында сақталған және жеке адамдардан жинастырылған сирек фото деректерді де кеңінен пайдаланған.
Кітап көпшілік оқырманға арналған.