БУККРОССИНГ: Сәбит Мұқанов кітапханасымен бірге КІТАП ОҚУ кеңістігі

Қазақстан Республикасы Президентінің кітап оқу мәдениетін дамытуға, зерделі ұлт қалыптастыруға, қоғамның зияткерлік және мәдени әлеуетін нығайтуға бағытталған Жарлығын іске асыру аясында Сәбит Мұқанов атындағы облыстық әмбебап ғылыми кітапхана кітап пен оқуды насихаттау ісін белсенді жалғастырып келеді.


Көптеген жылдар бойы кітапхана кітапсүйер қауымның басын қосатын рухани орталық, білімге құштарлық оянып, рухани құндылықтар дәріптелетін, оқу мәдениеті қалыптасатын ерекше мекен.
2019 жылы кітапхана республикалық «Оқырманы озық өлке» байқауының жеңімпазы атанып, бүгінгі күнге дейін осы мәртебелі атақты абыроймен алып келеді. Кітапхана өңір тұрғындарын кітап оқуға баулып, кітапқа деген сүйіспеншілікті арттыру жолында нәтижелі жұмыс жүргізуде.
«Оқитын өңір» бағдарламасы аясында кітапхана мәдени-ағартушылық бағыттағы көптеген жобаларды жүзеге асырып, мазмұнды іс-шаралар мен кітап оқуды насихаттаудың заманауи үлгілерін ұйымдастырып келеді. Басты мақсатымыз – кітапты әр адамның өмірінің ажырамас бөлігіне айналдыру, қоғамдағы оқу мәдениетін дамыту және кітаптың әлі де шабыттың, даналықтың, білімнің әрі рухани кемелденудің қайнар көзі екенін кеңінен насихаттау.
«Зерделі ұлт» бастамасы аясында қоғамдық орындарда — дүкендерде, дәмханаларда, мейрамханаларда және тұрғындар көп жиналатын басқа да мекендерде буккроссинг алаңдарын ашу ерекше маңызға ие болды. Енді кітап кітапхана қабырғасынан шығып, әр адамға бұрынғыдан да жақындай түсті.
Буккроссинг – бұл жай ғана кітап алып немесе қалдырып кететін орын емес, ол – кітап оқу, демалу және мәдени қарым-қатынас жасау кеңістігі. Мұнда адамдар күнделікті қарбаластан бір сәт демалып, кітап оқып уақыт өткізе алады, жаңа әдебиеттермен және авторлармен танысады, әсерлерімен бөліседі, жаңа жанрларды ашады әрі жайлы атмосферада демалады.
Мұндай алаңдар кітапты адамдарды жақындастыратын, жаңа таныстықтарға жол ашатын және оқуға деген ортақ қызығушылықты қалыптастыратын ерекше ортаға айналдырады. Мұнда түрлі буын өкілдерін кітап оқуға деген ортақ қызығушылық біріктіреді. Олар өзара кітап алмасып, алған әсерлері мен ой-пікірлерімен бөліседі. Ал әдебиеттердің еркін айналымы кітапты әр оқырманға жақындатып, оқуды баршаға қолжетімді етеді.
Біз кітапқа деген сүйіспеншілік дәл осындай қарапайым әрі жүрекке жылы сәттерден басталатынына сенеміз. Бір сәт аялдап, қолыңа кітап алып, оның ерекше әлемін сезініп, жаңа ойлар мен әсерлерге жол ашу – кітап оқуға деген қызығушылықтың алғашқы қадамы.
Сәбит Мұқанов атындағы кітапхана оқу кеңістігін қалыптастыру жұмысын сенімді түрде жалғастырып келеді, бұл кітапқа деген сүйіспеншілікті оятатын, рухани құндылықтарды нығайтып, зерделі әрі зияткер ұлт қалыптастыратын кеңістік.